fontໜ່ວຍຊາວໜຸ່ມຮາກຖານພະແນກ ວຕ.ນວ ສະຫຼຸບການຈັດຕັ້ງປະຕິບັດວຽກງານ

ໜ່ວຍຊາວໜຸ່ມຮາກຖານພະແນກ ວິທະຍາສາດ ແລະ ເຕັກໂນໂລຊີ ນວ   ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຂອງຕົນຂື້ນໃນວັນທີ16 ກໍລະກົດ 2018 ໂດຍການເປັນປະທານຂອງສະຫາຍ ສຸກນິລັນດອນ ແສງລັງສີ ເລຂາໜ່ວຍຊາວໜຸ່ມຮາກຖານ ພວຕ.ນວ, ສະຫາຍ ສັງຄົມ ປວງປະດິດ ຮອງເລຂາ, ປະທານກວດກາ, ສະຫາຍ ວົງຄຳ ມຸນຕີວົງ ຮອງເລຂາ, ພ້ອມດ້ວຍສະມາຊີກຊາວໜຸ່ມພາຍໃນພະແນກເຂົ້າຮ່ວມຢ່າງ ພ້ອມພຽງ.

 

ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອເປັນການສະຫຼຸບຜົນການຈັດຕັ້ງປະຕິບັດແຜນພັດທະນາຊາວໜຸ່ມຮາກຖານ ພວຕ.ນວ ປະຈຳໄຕມາດ II (04,05,06) 2018 ແລະ ທິດທາງແຜນການປະຈຳໄຕມາດ III (07,08,09) 2018 ໃນໂອກາດດັ່ງກ່າວ ສະຫາຍ ສັງຄົມ ປວງປະດິດ ຮອງເລຂາທັງເປັນປະທານກວດກາໜ່ວຍຊາວໜຸ່ມຮາກຖານ ພວຕ.ນວ ໄດ້ລາຍງານ ເຊີ່ງມີເນື້ອໃນບາງຕອນດັ່ງນີ້: ຊາວໜຸ່ມພະແນກ ວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ມີສະມາຊິກຊາວໜຸ່ມລວມທັງໝົດ 34 ສະຫາຍ, ຍີງ 13 ສະຫາຍ, ໃນໄລຍະ 3 ເດືອນຜ່ານມາ ຄະນະບໍລິຫານງານຊາວໜຸ່ມປປລ ພວຕ.ນວ ໄດ້ຈັດຕັ້ງປະຕິບັດການອອກແຮງງານ ແລະ ແຂ່ງຂັນກັນສ້າງຂະບວນການຂ່ຳນັບຊົມເຊີຍ ວັນສຳຄັນຂອງຊາດ-ຂອງພັກ ພາຍໃຕ້ການຊີ້ນຳ-ນຳພາຂອງເລຂາໜ່ວຍພັກ ພວຕ.ນວ ແລະ ຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ, ເຮັດໃຫ້ຄະນະບໍລິຫານງານຊາວໜຸ່ມປປລ ພວຕ.ນວ ມີຄວາມສາມັກຄິເປັນປຶກແຜ່ນ ມີຄວາມເປັນເອກະພາບລະດັບສູງ, ມີບັນຍາກາດຟົດຟື້ນຫ້າວຫັນໃນຖັນແຖວຊາວໜຸ່ມ. ດັ່ງນັ້ນຈຶ່ງເຮັດໃຫ້ສະມາຊິກຊາວໜຸ່ມໃນພະແນກສາມາດຜ່ານຜ່າອຸປະສັກນາໆປະການເຮັດໃຫ້ການປະຕິບັດວຽກງານຊາວໜຸ່ມສຳເລັດໃນຫຼາຍດ້ານ.

ໃນຕອນທ້າຍກອງປະຊຸມດັ່ງກ່າວ ສະຫາຍ ສຸກນິລັນດອນ ແສງລັງສີ ກໍ່ໄດ້ກ່າວຮຽກຮ້ອງມາຍັງສະມາຊິກຊາວໜຸ່ມ ທຸກສະຫາຍ ໃຫ້ເອົາໃຈໃສ່ເຊື່ອມຊືມວຽກງານທາງດ້ານການເມືອງແນວຄິດ, ສ້າງຄວາມສາມັກຄີກັນທັງພາຍໃນ ແລະ ພາຍນອກ, ສືບຕໍ່ເອົາໃຈໃສ່ປະຕິບັດວຽກງານວິຊາສະເພາະໃຫ້ດີຂື້ນ, ປະຕິບັດລະບຽບລັດຖະກອນຢ່າງເຂັ້ມງວດ ຝຶກຝົນຫຼໍ່ຫຼອມຕົນເອງໃຫ້ກາຍເປັນມະຫາຊົນກ້າວໜ້າ.    

back1back2